Negosyo laban sa kalikasan

NEGOSYO LABAN SA KALIKASAN

Negosyo versus kapaligiran
Negosyante versus kalikasan
Dahil sa tubo, silang gahaman,
Sa kapwa ay walang pakialam

Serbisyo'y tinuring na negosyo
Kalikasa'y sinisirang todo
Iyang sistemang kapitalismo
Ay talagang perwisyong totoo.

Sinira ang bundok, kina-quarry
Lupa'y minimina ng salbahe
'Lang tugon sa climate emergency
Basta kumita lang, walang paki.

Katotohanang dapat tanggapin
Negosyo'y nangwawasak sa atin
Mga lupa't bundok minina rin
At katutubo'y pinalayas din

Tumingin ka sa paligid-ligid
Kalikasa'y kanilang nilubid
At kayraming sa gabi binulid
Pati buhay ng kapwa'y pinatid.

Nang dahil sa pagkamal ng tubo
Kalaban ng negosyo'y naglaho
Niyurak dangal ng katutubo
Inagaw pati lupang ninuno.

Kung nais mong tulungan talaga
Ang bayan, dapat tanggapin mo na:
Negosyo'y mapanira talaga
Upang bumundat, kumita sila.

Kung di mo ito kayang matanggap
Kalikasa'y di mo nililingap
Kapitalismong nagpapahirap
Ay kalabang sadyang mapagpanggap.

- gregoriovbituinjr.
08.19.2026

* mga litrato mula sa google

Mga Komento

Mag-post ng isang Komento

Mga sikat na post sa blog na ito

Mutual aid, di limos, ang community pantry

Imahe
MUTUAL AID, DI LIMOS, ANG COMMUNITY PANTRY ito'y hindi limos, kundi pag-agapay sa kapwa hindi kawanggawa kundi pagtutulungang kusa bigayan, ambagan, damayan, kaisahang diwa hindi charity, kundi mutual aid, ang siyang tama iyan ang paglalarawan sa community pantry damayan ng bawat isa, di limos, di charity salamat kung naipaliwanag itong mabuti upang hindi i-redtag ng mga loko't salbahe prinsipyo dito'y magbigay ayon sa kakayahan at kumuha lang ayon sa iyong pangangailangan sa bawat araw at kapwa'y iisipin din naman na siyang patnubay natin sa pagbabayanihan di ba't kaygandang konsepto ng community pantry na sa panahong ito'y nagdamayan ang marami - gregoriovbituinjr. * Balita mula sa: https://newsinfo.inquirer.net/1420463/community-pantry-not-charity-but-mutual-aid
Magbasa nang higit pa

Kaunting tulong para sa kalikasan

Imahe
KAUNTING TULONG PARA SA KALIKASAN patuloy pa rin akong gumagawa ng ekobrik na sa mga patay na oras ay nakasasabik gupit ng gupit ng plastik ng walang tumpik-tumpik upang tulungan ang kalikasan sa kanyang hibik paulit-ulit ko mang sabihing naglipana ang plastik na basura sa laot, bahay, kalsada ngunit tila binabalewala ito ng iba katwiran nga'y may trak na tagahakot ng basura bukod sa paglikha ng ekobrik, may yosibrik din na pawang upos ng yosi naman ang titipunin at ipapasok sa boteng plastik, isa-isahin ah, nakakadiri naman daw ang aking gawain ngunit nais kong may maitulong sa kalikasan ekobrik at yosibrik ang aking pamamaraan ayokong malunod sa upos ang ating karagatan ayokong maging basurahan ang mga lansangan gawing mesa't upuan ang magagawang ekobrik pag-isipan kung anong magagawa sa yosibrik mahalaga'y matipon ang ating mga siniksik baka naman may makita pang solusyon sa plastik kaunting tulong lang naman ang aking ginagawa kaya sana layuning ito'y iyong maunawa ...
Magbasa nang higit pa

Lansangan

Imahe
LANSANGAN madalas kong tahakin ang aspaltadong lansangan na sa tuwina'y mabibilis yaong mga hakbang animo'y hinahabol ng mga sigbin at aswang habang nangangamoy asupre yaong lupang tigang di ko mawari sinong sa akin ay sumusunod tatambangan ba dahil sa bayan ay naglilingkod dahil ba ako'y isang masugid na tagasunod bilang aktibistang sa rali raw sugod ng sugod ngunit payapa pa rin akong sa daan tumawid panatag ang loob na sa dilim di mabubulid habang samutsaring isyu ng bayan ay di lingid patuloy ang pagbaka habang nagmamasid-masid dapat pandama'y patalasin at laging ihasa upang maging handa sa mga daratal na sigwa lalagi akong kakampi ng uring manggagawa habang tinatahak ang landas ng kapwa dalita - gregoriovbituinjr. 01.09.2022
Magbasa nang higit pa