Tula at Larawan

PAYÒ SA SARILI dapat pa ring pagsanayang magkwento habang sa sipnayan ay pulos kwenta di lang tulâ ang dapat isulat ko kundi kwento hanggang maging nobela salamat,  Talibà ng Maralitâ dahil ako'y inalagaang sukat dahil tula't kwento'y nilalathalà dahil pahayagan kang mapagmulat pagkathâ ng kwento'y pagbubutihin baka sa akin ito ang magdala sa pagtingalâ sa mga bituin at kinabukasang asam talaga isang nobela'y aking sinusulat kayâ ngayon ay nagsusumigasig dapat pagsikapan ang lahat-lahat bakasakaling dito makatindig - gregoriovbituinjr. 01.31.2026

SALAMAT SA SAGIP GUBAT MOVEMENT binili ko man kaya mayroon ng t-shirt, mahalaga'y ang misyon sa ekolohikal na proteksyon sa t-shirt man lang ay makatulong wala na akong ambag, iyan lang ang itaguyod ang kapakanan ng kalikasan, kapaligiran mapagmulat ang t-shirt na iyan salamat sa  Sagip Gubat Movement ramdam kong naging kabahagi rin ng kanilang layon at tungkulin walâ man sa aktwal na gawain subalit kung may pagkakataon makikiisa ako sa misyon dadalo ako sa bawat aksyon para sa kapakanan ng nasyon - gregoriovbituinjr. 01.31.2026 * makakabili ng tshirt sa kawing na:  https://www.stumpfybestdeals.com/Sagip-Gubat-Movement  

TULÂ 2: SA 5TH BLACK FRIDAY PROTEST NG 2026 tungkulin ko nang ganap na niyakap ang pinag-usapang  Black Friday Protest na kaisa ang kapwa mahihirap kumikilos pa rin tuwing  Biyernes nagkakaisa kaming magpatúloy hangga't walang korap na nananagot kikilos pa rin kahit kinakapoy dapat nang may makulong na kurakot at mahúli ang malalaking isdâ pati mga buwitre at buwaya pag-alabin pa ang galit ng madlâ nang mabago ang bulok na sistema sarili kong katawan at isipan ang aking ambag sa mga protesta laban sa nangurakot at kawatan sa pondo ng bayan, tanginanila - gregoriovbituinjr. 01.30.2026

TULÂ 1: SA 5TH BLACK FRIDAY PROTEST NG 2026 dapat patuloy ang mga  Black Friday Protest dahil ang masa'y patuloy na nagagalit dahil trapong sa pondo ng bayan nang-umit ay dapat talagang managot at mapiit di tayo dapat manahimik lang sa tabi di dapat makalusot ang mga salbahe patuloy pagningasin ang pusò ng api hanggang mag-alab at sa bayan ay magsilbi sistema'y baguhin, patuloy na sumulong dapat mapanagot ang mga mandarambong sa kaban ng bayan,  TONGresman  at  senaTONG pati mga  kontrakTONG  ay dapat ikulong kung di tayo kikilos ngayon, aba'y sino? tuwing  Black Friday Protest , sama-sama tayo panagutin ang mga korap sa gobyerno at pagulungin ang kanilang mga ulo - gregoriovbituinjr. 01.30.2026

buting may ginagawâ kaysa nakatungangâ buti nang tumutulâ di man kinakalingâ - tanaga-baybayin gbj/01.30.2026

ALEX EALA AT ALEX PRETTI dalawang Alex ang bandera ng balita isa'y Pinay tennis star ng ating bansa isa naman ay nurse na itinumbang sadya kaya sa U.S. nagpoprotesta ang madla si Eala ay nasa kauna-unahang Philippine Women's Open na dito naman sa bansa ginanap dahil sa kasikatan niya sa mundo't mga napagtagumpayan si Pretti nama'y isang intensive care nurse na tinadtad ng bala ng mga ahente ng U.S. Customs and Border Protection sa rali bunsod ng pagpaslang kay Renee Good si Eala nga sa tennis ay inspirasyon sa bawat laban ay dala niya ang nasyon si Pretti'y biktima ng U.S. immigration kay Trump ay crackdown sa illegal immigration kay Alex Eala, mabuhay! pagpupugay! na sa buong mundo'y pinakita ang husay! sa pamilya ni Pretti, taos na pagdamay! sana ang hustisya'y makamit niyang tunay! - gregoriovbituinjr. 01.30.2026 Mga Pinaghalawan: https://www.facebook.com/alltvnewsph/videos/icymi-philippine-pride-alex-ealas-interview-with-sportscaster-dyan-castillejo-at/2...

FPJ: MAGALING SA HALABÓT ilang beses kong si  FPJ  pinanood na sa mga bakbakan, kaybilis bumunot kapag mga kontrabida na'y nagsisugod bibilib ka sa kanyang galing sa halabót pinanonood namin siya sa sinehan noong nag-aaral pa't aking kabataan napanood ko nga ang  Isang Bala Ka Lang! Batas ng Lansangan, Dito sa Pitong Gatang, Pakner, apat na seryeng Panday, Asedillo, Ang Dalubhasà, Maestro, Eseng ng Tondo Lakay, Pepeng Kaliwete, Roman Rapido, Batang Quiapo, Batas ng Kwarenta'y Singko ilan ay napanood ko sa telebisyon sa  FPJ sa GMA  na serye noon Fernando Poe Jr., National Artist  ngayon mga kwento ng api, sa puso'y bumaón - gregoriovbituinjr. 01.30.2026 * halabót - biglaang pagbunot, gaya ng baril mula sa kaluban nito * halaw mulâ sa Diksiyonaryong Adarna, p.287

HALAGAP AT LINAB malalalim o kaya'y lumà ang mga gamit na salitâ minsan di agad maunawà pagkat sa diwa'y bagong sadyâ ang tanong sa  Sampú Pahalang : Halagap ng sebo , di alam Linab  ang naging kasagutan mabuti't akin nang nalaman ang krosword nga'y ganyan madalas may salitang kang makakatas bago man o luma'y lalabas na sa krosword unang nawatas salamat sa krosword na ito at may natutunan pang bago na magagamit ko sa kwento at tulang isinusulat ko - gregoriovbituinjr. 01.29.2026 * krosword mulâ sa pahayagang Pilipino Star Ngayon, Enero 29, 2026, p.11 * kahulugan ng halagap at linab, mula sa Diksiyonaryong Adarna, pahina 287 at 530

MAG-INGAT LABAN SA NIPAH VIRUS mag-ingat po tayo laban sa  Nipah virus na may outbreak umano sa  West Bengal, India natala raw noon ang labimpitong kaso ng  Nipah virus  doon sa  Sultan Kudarat higit sampung taon na ang nakararaan kabilang sa sintomas nito ang trangkaso na ilan sa mga pasyente'y nakitaang namamagâ ang utak o  encephalitis at impeksyong  meningitis  na nakuha raw matapos kumain ng karne ng kabayo at nahawa sa mga taong apektado paniki't baboy pa'y ilan sa sanhi nito kaytindi na ng naranasan sa pandemya ang  Nipah virus  ay nakapag-aalala sana ang ating bansa'y bantayan talaga - gregoriovbituinjr. 01.29.2026 * ulat mulâ sa pahayagang Abante at Pilipino Star Ngayon, Enero 29, 2026, p.2

ANG KATALINUHAN NG MABAGAL NA PAGONG Maikling sanaysay at tula ni Gregorio V. Bituin Jr. Mahusay ang mabagal na pagong. Marami nang magkwento nito. Kahit ang pambansang bayaning si  Gat Jose Rizal  nga'y kumatha ng klasikong pabulang  Ang Pagong at ang Matsing . Ito ang pinagmulan ng kawikaang  "tuso man ang matsing, napaglalalangan din." Bata pa ako'y napanood ko na si  Pong Pagong at Kiko Matsing   sa palabas na  Batibot  na parang  Sesame Street  sa Amerika. Batay din ang karakter nila sa kathâ ni Dr. Rizal. Napanood ko rin noon ang  Teenage Mutant Ninja Turtles  na apat silang ipinangalan sa mga sikat na pintor na sina  Michaelangelo, Leonardo, Donatello  at  Raphael . Kilala ang pagong na mabagal maglakad, subalit matiyagâ. Sa pabulang  Ang Pagong at ang Kuneho ni Aesop , naghamunang magpabilisang makarating sa itinakdang dulo o finish line sina Pagong at Kuneho. Subalit nauna si Pagong na marating ang ...

FU DALU kung sakaling dalawin ni  Fu Dalu , ang tagahabi ng mga pangarap, ay makapagtitirintas ng kwento at tulang nasalubong sa hinagap dinadalaw niya sa panaginip ang mga kababaihang  Tboli upang ipakita ang halukipkip niyang disenyo para sa  tinalak o yaong mga hibla ng abaka na tinitina at kinukulayan sa pamamaraang  ikat  bago pa iyon habihin upang maging tela si  Fu Dalu , diyosa at  dreamweaver , ay magpakita sana sa makatâ o baka nakita na bilang bearer na naghayag ng samutsaring paksâ sakaling sa abaka ko isulat ang aking tulâ sa anyong  baybayin kanyang disenyo'y itutulang sukat si  Fu Dalu  kayâ ako'y dalawin? - gregoriovbituinjr. 01.29.2026 * unang dalawang litrato mula sa google * hinalaw ang Tboli, tinalak, at ikat sa Diksiyonaryong Adarna, pahina 337, 915, at 928

saanman pluma'y bitbit nitong makatang taring tula ng tula kahit wala sa toreng garing - tanaga-baybayin gbj/01.28.2026

SA PAG-IISA (Sa ika-210 taon ng tulang "To Solitude" ng makatang Ingles na si John Keats) ako na'y nag-iisa bálo, walang kasama subalit kinakaya nais kong mabuhay pa ay, mag-isa'y balaraw sa búhay kong mapusyaw na sa bawat paggalaw mundo ko'y nagugunaw tangi kong nalilirip ang nasa panaginip may diwatang nahagip na sa akin sumagip oo, ako na'y bálo solo na lang sa mundo kumunoy na ang dulo ng nilalakaran ko pawang lumbay at luhà subalit di kawawà kakathâ kahit bahâ daanan man ng sigwâ - gregoriovbituinjr. 01.28.2026

ANG PINILI KONG LANDAS (Sa ika-110 taon ng tulang "The Road Not Taken" ng makatang Scot na si Robert Burns) oo, pinili ko'y landas na bihirang tahakin landas ng karangalan upang masa'y di hamakin landas ng pagbaka upang obrero'y di apihin landas na madugô upang dukha'y di maliitin batà pa'y pinangarap nang paglingkuran ang bayan kayâ pinili ko ang landas ng kabayanihan bagamat punong-punô man ng kasalimuotan ay patuloy na tinahak ang baku-bakong daan datapwat magulo ay doon lang mapapanatag ang buhay, diwa't kaloobang ayaw maging hungkag magbubô man ng laksang pawis at dugo'y papalag sa pag-iral ng sistemang bulok ay di patinag sa kaliwâ man ng sangandaan ako lumikô sementado man ang kanang daan ay di mahulô sa pinili kong daan may lipunang mabubuô lipunang makatao at ang bulok ay guguhò - gregoriovbituinjr. 01.27.2026

BUNBU ICHI (Bunbu ichi - pen and sword as one) tila pluma'y kaytalas talaga sintalas ng kris o ng espada kayâ patuloy lang sa pagkathâ ang tulad kong kwentista't makatâ sa pagsusulat ng minimithi ay gamit ang Hapong bunbu ichi yao'y pinag-isang pluma at kris na parang lintik kung humagibis matalas ang mga sinusulat na sa masa'y nakapagmumulat parang tinamaan ng palasô ang diwa't puso'y pinagdurugo paumanhin kung ika'y umaray pagkat sa masa ang tula'y tulay ko upang ako'y maunawaan at sila'y aking maunawaan - gregoriovbituinjr. 01.26.2026 * litrato mula sa google *  https://writingslowly.com/2025/12/28/the-unity-of-pen-and.html * The saying most commonly associated with the samurai class is “bunbu ichi” or “pen and sword, as one.”  https://www.thecollector.com/medieval-knights-vs-samurai-warriors/

PANAGIMPAN matutulog muli ngayong gabi nang tila baga walang nangyari may nakathâ bang maikling kwento? batay sa nangyayari sa mundo pulos tulâ lang ang nakákathâ subalit ano ang pinapaksâ? mga sariwang isyu ng bayan? o di palagay na kalooban? ay, sana'y muli pang managinip ng isyung talagang malilirip na pagdatal ng madaling araw ay may makathâ kahit maginaw ang tulog dapat ay walong oras subalit púyat ay nababakas pagkat madaling araw na'y gising at isusulat na ang panimdim - gregoriovbituinjr. 01.25.2026

TAKBÂ PALA'Y TAMPÍPI muli'y aking nakasalubong ang takbâ sa palaisipan tampípi ang aking tinugon na sa diwa'y di nalimutan iyon ang maleta ni Lolo kapag lumuwas ng Maynilà sa kawayan ay yari ito o kaya'y sa ratan nilikhâ pag pinag-isipang maigi luma man o lalawigan babalik sa iyong mabuti ang salitang di nalimutan nagbabalik sa alaala palaisipan yaong tulay gunitâ nina Lolo't Lola sa diwa'y nagbalikang tunay - gregoriovbituinjr. 01.25.2026 * krosword mulâ sa pahayagang Pilipino Star Ngayon, Disyembre 20, 2025, p.10 * Diksiyonaryong Adarna, mp. 887 at 901

NAKAMIT BA'Y DALAWA O APAT NA GINTO? parehong petsa, magkaibang pahayagan dapat pareho ang ulat, di ba, kabayan? sa isa, dalawang ginto'y kuha ni Otom sa isa pa, apat na ginto'y kuha niyon bakit magkaiba sila ng iniulat? baka ang isa'y ipinadala na agad ang balita kahit di pa tapos ang laban ang isa, buong pangyayari'y nasaksihan kay  Angel Mae Otom , mabuhay ka! mabuhay! apat na ginto ang iuuwi mong tunay! ang ASEAN Para Games record ay binura sa sandaang metrong free style pa talaga ang pangalan niya'y tiyak maiuukit sa kasaysayan ng isports, pati nakamit kay  Angel May Otom , pagpupugay sa iyo! salamat! dangal ka ng bansâ nating ito! - gregoriovbituinjr. 01.25.2026 * ulat mulâ sa pahayagang Bulgar at Pilipino Star Ngayon, Enero 24, 2026, p. 12

TAKÓT SA SARILING ANINO takót sa sariling anino ang mga kurakot sa pondo ng bayan, sadyang mga tuso at kunwari'y relihiyoso upang makalusot sa kaso nais nilang maipakita sa masa, matitino sila mapagbigay pa ng ayuda tinatago ang ebidensiya basta lang di makulong sila kunwari'y may Bibliyang tangan gayong bistado nang kawatan sagad na sa katiwalian kayâ sila'y kinakasuhan ng pagkakasala sa bayan pinaniniwala pa tayo na sila'y mga banal, santo at napakarelihiyoso baka sila'y santong kabayo sa pondo ng bayan, dorobo! - gregoriovbituinjr. 01.25.2026

IDLIP kaytagal natulog / ng aking isipan sabay lang sa agos / na parang alamang tila di mabatid / ang kahihinatnan buti't iwing dangal / ang naging sandigan kayraming naisip / ngunit di malirip nakatunganga lang / sa kisame't atip ang bilog na buwan, / di man lang masilip nadama talaga'y / kaytagal naidlip nagawa'y itulâ / ang mga diwatà at ang rikit nila'y / nakakatulalâ ako'y patuloy lang / na sinasariwà ang pusong duhagi, / kakabit ma'y luhà ako'y nagigising / pag may kakathain pag aking narinig/ ang bulong ng hangin matapos masulat / ang hahalagahin tutulog na't diwa'y / pagpapahingahin - gregoriovbituinjr. 01.24.2026

DAPAT PALA'Y MAY ALAM DIN SA GEOGRAPHY higit sa sampung tanong / hinggil sa mga lugar sa bansa't ibang bansâ / sa krosword ay tinugon kayâ ang geography / ay dapat nating alam o kaya'y sa krosword na / natin natututunan Siam  ang dating ngalan / ng kapitbansang Thailand  may lungsod din ng  Reno  / sa Nevada, U.S.A. at lugar na sa bansâ / ang karamihang tanong na agad naman nating / talagang sinagutan naroroon sa Pasay  / ang airport ng  NAIA Glan  ay sa Saranggani, / di sa South Cotabato ang bayan ng  Panabo , / nasa Davao del Norte  ang bayan ng  Maasin  / ay nasa Southern Leyte ang  Angat  sa Bulacan, /  Minglanilla  sa Cebu Pili , Camarines Sur, /  Panguntaran  sa Sulu bayan ng  Aliaga  / sa Nueva Ecija may  Lian  sa Batangas / at marami pang iba may bayan ng  Anilao , / di lamang sa Batangas kundi sa  Iloilo, /  Oton  din ay narito pagkaminsan talaga / ay sa ...

PINAGKAKAKITAAN AT ANG INIWANG SANGGOL tatlong ulat ng sanggol na nasa diyaryo ang napabalitang nasagip, nailigtas sa iba't ibang lugar na magkakalayô sa krimeng child trafficking, kaytindi ng danas dalawang sanggol na ibinebenta onlayn ang nailigtas; sanggol na ibinebenta ng walong libong piso ay nabawi habang nadakip naman ang mismong inang nagbenta sanggol na isinupot, sa geyt isinabit bakit ginanon? pinabayaan ang batà! nakitang gumalaw kaya ito'y nasagip nang makita nila'y nakangiti ang batà talaga bang nang dahil sa hirap ng buhay? pati na sariling dugo'y ibinebenta! bakit kanilang sanggol ay idinadamay? na baka magmulat na wala silang ina kay-aga nang biniktima ang mga sanggol na wala pang muwang sa kanilang sinapit sa murang edad nila'y dapat ipagtanggol at karapatan nila'y huwag ipagkait * ulat mula sa mga pahayagang Abante, Enero 18, 2026, p.3; Abante Tonite, Enero 23, 2026, headline at p.3; Pang-Masa, Enero 24, 2026, p.3

kahit saan sumuot ay di makalulusot iyang mga kurakot na tuso at balakyot - tanaga-baybayin gbj/01.23.2026

SA 4TH BLACK FRIDAY PROTEST NG 2026 nagpapatuloy ang  Black Friday Protest sapagkat ayaw natin ng  Just-Tiis laban sa korap at mapagmalabis dapat silang managot at matugis di pa tapos itong gálit ng masa na hanggang ngayon ay nagliliyab pa wakasan na ang mga dinastiya baguhin na ang bulok na sistema kada Biyernes , di kalilimutan tuligsain ang mga lingkod bayan na inihalal sa kapangyarihan ngunit naging mandarambong, kawatan ikulong ang kurakot na masahol pa sa hayop, talagang mga ulol pondo ng bayan, binulsa't ginugol sa sarili, di sa bayan inukol kada Biyernes , kikilos, may tulâ ambag sa pakikibaka ng madlâ laban sa mga korap at kuhilâ na dapat lang nating tinutuligsâ - gregoriovbituinjr. 01.23.2026 * litrato kuha sa Pasig opis

IKALIMA, HINDI IKA-LIMA salitang ugat o pangngalan, di numero kayâ bakit may gitling ang panlaping "ika" di ba't kayâ panlapi, kinakabit ito sa salitâ, arâlin n'yo ang balarila maraming nalilito, may maling pagtingin sa paglagay ng gitling sa mga salitâ ikalima, di ika-lima; walang gitling ika-5, di ika5 yaong diwà nilalagyan ng gitling matapos ang "ika" sapagkat numero na ang kasunod niyon kayâ madali lang maunawâ talaga pagkakamali'y di na sana ulitin pa sana sa eskwelahan, maituro muli lalo sa mga estudyante't manunulat huwag nang ulitin yaong pagkakamali at sa wastong gamit ng gitling na'y mamulat - gregoriovbituinjr. 01.22.2026 * litrato mula sa krosword ng pahayagang Pilipino Star Ngayon, Enero 22, 2026, p.10     

UTANG di ko pa magamit ang pagsulat at pagsasalin upang kumita ng pera't makabayad ng utang na umabot ng milyon, saan ko iyon kukunin tila ako'y isang dambuhala't malaking mangmang ngunit umaasang makalilikhâ ng nobela hinggil sa mga napapanahong problema't isyu: katiwalian, flood control, panawagang hustisya, dinastiya, buwaya, buwitre, kawatan, trapo, o pagsinta, makatâ ma'y wala sa toreng garing, o ikwento ang isyu ng manggagawa't pesante, o prinsipyo't tindig sa mga akda'y mapatining, o kalagayan ng manininda, batà, babae marahil ay parang  Lord of the Rings  o  Harry Potter katha nina  J.R.R. Tolkien  at  J.K.Rowling mga idolo kong awtor, magagaling na writer o kaya'y awtor na sina  Mark Twain  at  Stephen King kumita sila sa kakayahan nilang magsulat ng mga akdang pumukaw sa harayà ng madlâ marahil, mga utang nila'y nabayaran agad dahil kumitang lubos ang kanilang mga akdâ - gregoriovbituinjr. 01.22.2026

TAMÀ NA ANG DRAMA nagiging swarswela na lang ba? at tadtad ng iskrip ang drama? na mapanagot ang buwaya? sana'y may maparusahan na! di lang buwaya kundi pating malaking isdâ at di kuting senador mang paladasalin kung may salà, ikulong na rin ayaw namin ng teleserye na tilà wala pang masisi masisibà na'y sinuswerte kung pulos drama ang mensahe ikulong ang mga kurakot! ilantad ang lahat ng sangkot! saan man sila magsisuot ay dapat madampot, managot! - gregoriovbituinjr. 01.22.2026 * litrato kuha sa pagkilos sa Senado, noong Enero 19, 2026

PASARING may pasaring muli ang komikero hinggil sa senaTONG na nakakulong di raw magtatagal sa kalaboso dahil sa kaytinding agimat niyon aba'y nagbiro pa si Mambubulgar sapul na sapul ang pinatamaan masa'y batid agad ang ibinulgar dahil headline naman sa pahayagan ngunit agimat ba'y tatalab kayâ sakaling siya'y makalaya agad? paano ang hustisya sa binahâ? dahil sa ghost flood control, anong bigat! o agimat ay sa pelikula lang? at di sa kurakot na puso'y halang? - gregoriovbituinjr. 01.21.2026 * mula sa pahayagang Bulgar, Enero 21, 2026, p.3

ANG AKLAT NA STILL BREATHING, 100 BLACK VOICES ON RACISM Nabili ko ang aklat na  Still Breathing, 100 Black Voices on Racism, 100 Ways to Change the Narrative , sa Book Sale sa Farmers Cubao noong Enero 10, 2026, sa murang halagang P35.00 lang. Makapal ang aklat na umaabot ng 308 pahina. Kaytindi ng pamagat ng aklat:  Still Breathing . Ibig sabihin: Humihinga pa! Humihinga pa sila dahil hindi sila natulad sa nangyari kay  George Floyd . Humihinga pa dahil nabuo ang kampanyang  Black Lives Matter  nang mamatay si Floyd. Natipon sa aklat ang isang daang boses ng mga tumututol sa rasismo sa Amerika, bunsod ng pagkamatay ng Itim na si George Floyd noong Mayo 25, 2020 sa Minneanapolis. Si Floyd, 46-taong-gulang, ay namatay matapos siyang arestuhin ng pulisya dahil sa umano'y paggamit ng pekeng $20 na perang papel. Mahigit siyam na minuto siyang niluhuran sa leeg ng pulis na si Officer Derek Chauvin, na nagresulta sa atake sa puso. Ang pangyayaring iyon ang naging san...

TUNGKULIN tungkulin ng bawat mandirigmâ bakahin ang burgesya't kuhilâ ipaglaban ang obrero't dukhâ at ang bayang api'y mapalayà bawat isyu ng madla'y mabatid di manahimik o maging umid ipagtanggol ang mga kapatid laban sa kaapihang di lingid tungkulin ng lider-maralitâ ang umugnay, makaisang diwà ang inaapi't nagdaralitâ dahil sistema'y kasumpâ-sumpâ niyayakap ang bawat tungkulin na pinagpasyahang tutuparin makauring prinsipyo'y baunin hanggang asam na hustisya'y kamtin tungkulin din ng bawat makatâ isyu ng masa'y tipuning sadyâ pagbaka'y ilarawan sa akdâ sanaysay, kwento, nobela't tulâ - gregoriovbituinjr. 01.20.2026

ANG SINING halina magpatuloy tayong gumawa ng ingay laban sa mga kurakot na korapsyon na'y gamay lagi't lagi, sining ng pagtula'y isinasabay sa bawat rali, nang kurakot panaguting tunay kumilos tayo! at huwag manahimik na lamang! magalit tayo! singilin ang kurakot na iyan! lumabas tayo! karapatan nati'y ipaglaban! maningil tayo! panagutin ang mga kawatan! ang sining ay di lang upang aliwin ang sarili kundi ito'y isa sa palagi nating kakampi sa paglikha ng kasaysayan, tagos ang mensahe sa sambayanang kaytagal nang nagdurusa't api baguhin na ang sistema! hiyaw ng taumbayan! mga trapo't dinastiyang pulitikal, wakasan! lahat ng mga kurakot ay dapat parusahan! ikulong na 'yang mga kurakot! sigaw ng bayan! - gregoriovbituinjr. 01.19.2026

PATULOY LANG SA PAGKATHÂ patuloy ang pagsusulat ng makatang nagsasalat patuloy na magmumulat upang isyu'y sumambulat patuloy na kumakathâ ng anumang isyu't paksâ hinggil sa obrero't dukhâ ikukwento, itutulâ na sa panitikan ambag na nais kong maidagdag saya, libog, dusa, hungkag, digmâ, ligalig, panatag ito na'y yakap kong misyon sulat, tulâ, kwento, tugon umaraw man o umambon para sa dalita't nasyon magdamag mang nagninilay akdang kwento't tula'y tulay sa masang laging kaakbay sa pagbaka man at lumbay - gregoriovbituinjr. 01.18.2026

HUSTISYA SA MGA DALAGITA'T BATANG PINASLANG sa loob lang ng isang linggo'y nabalità dalawang kinse anyos yaong ginahasà at pinaslang, habang otso anyos na batà nama'y pinaslang ng tiyuhing walang awà ganyang mga ulat nga'y karima-rimarim nangyari sa kanila'y talagang kaylagim budhi ng mga gumawa'y uling sa itim kung ako ang tatay, mundo ko na'y kaydilim kung anak ko silang sa puso'y halukipkip  tiyak na nangyari'y di ko lubos maisip ilang araw, buwan, taon kong di malirip ang mga suspek na halang, sana'y madakip kung di man baliw, baka mga durugista yaong mga lumapastangan sa kanila ang maisisigaw ko'y  hustisya! hustisya! hustisya sana'y kamtin ng tatlong biktima! - gregoriovbituinjr. 01.17.2026 * headline sa pahayagang Pang-Masa, Enero 10, 2026, at pahayagang Bulgar, Enero 13 at 17, 2026